أنا مش هانام أنا هاثور

dr.sambo

أنت مين؟

الشعب المصرى اللي تعداد سكانه وصل حوالي 80مليون نسمه لو جيت تقسمه من حيث علاقته بوضع البلد والحكومه هتلاقي خمس ست أنواعهم دول جميع أنواع العلاقه بين الشعب و الحكومه

أغلب الشعب معترض علي اللي بيحصل في البلد بس المشكله أنه بيعترض بينه وبين نفسه لأنه خايف وكل اللي بيعمله بيقول يا حيطه دارينى ويسمع كلام الحكومه ويوافق عليه حتي لو مش مقتنع بيه ودى غالبيه الشعب المصري

وفيه ناس متعرفش أى حاجه بتحصل في البلد نهائى لوالنوع ده عايش علشان يربييي العيال ويأمن مستقبلهم بس المشكله أن البلد محدش عارف لها مستقبل اللهم الا جمعيه جيل المستقبل بتاعه جمال مبارك

وناس تانيه منفضه لكل حاجه وأطلقت اللحيه وقصرت البنطلون والجلبيه ومقضيها عباده وبس وشايفه أنه ما لهمش دعوه بسياسه البلد وكأن لو قال رأيه وكان ليه موقف من الوضع الحالي هياخد ان شاء الله حسنات لأن كده برده بيساعد علي المنفعه العامه للبلد غغير ان السكوت علي الظلم حرام ولا أنا بتهيألي

أما الناس اللي دماغها متكلفه وأصحاب مزاج فدول فيهم ناس معترضه بس بينأشوا المواضيع دى وهما فى عالم تانى ولما يرجعوا تاني للعالم بتاعنا يقعدوا ساكتين ، ودول ليهم وجهه نظر وهي مادام الحكومه عارفه عنهم كل حاجه وسايباهم ليه يعترضوا ما الوضع ده عاجبهم وميه ميه (اللي هو نظام انت فى حالك والحكومه في حاله)صباح الدماغ العاليه

أما النوع المستفيد من الحكومه من رجال الأعمال في الحزب الوطني واللي مستفيد من وضع البلد الحالي فيعترضوا ليه فده عز الطلب _وده

طبعا ده غير عز الدخيله_ معلش حتي استظراف

أما النوع الأخير فدول اللي شايلين هم البلد وبييحاولوا يمشوا في طريق اصلاح البلد بس طبعا الحكومه مش سايباهم في حالهم ده غير ان الناس بتعتبرالناس دي أفلاطونين ودماغهم لسعه ومفوته

بأختصارهو ده السعب المصري من وجهه نظري

يبقى الشعب ده مظلوم ولا ظالم نفسه؟؟؟؟الله أعلم

dr.sambo

حقك علينا

اللي حصل في ماتش الزمالك و الأسماعلى في الأسبوع الأول من الدوري مسخره وقله قيمه ،ويتحمل مسئوليتها حازم لأن مستواه زي الزفت وخلاص احنا علي أخرنا بجد لأن ده الموسم التالت علي التوالي من غير ولا بطوله ،بس برضه دي مش حجه لأنه حتي لو معترضين علي وجود حازم ما يبقاش بالطريقه دى لأن ده أسلوب غجر وأحنا مش كده ولازم نفضل فاكرين ان حازم ده برضه كان الفتي المدلل للزمالك وعمل معنا و مع المنتخب أنجازات كتير

أنجازاته الشخصيه
هو أول لاعب مصرى و عربى يلعب فى الدورى الايطالى حيث لعب لنادى أودونيزى

صاحب أفضل مهارات لاعب كرة قدم فى العالم فى المسابقة التى قدمتها شركة بيبسى عام 2001
متفوقا على دافيد بيكهام , دوايت يورك , روبرتو كارلوس , ريفالدو , روى كوستا , فيرون و قد قام برئاسة لجنة التحكيم السير أليكس

أفضل لاعب مصرى لعام 2003 باختيار الاتحاد المصرى لكرة القدم

أفضل لاعب مصرى لعام 2001 فى استفتاء مؤسسة أخبار اليوم

أفضل صانع ألعاب فى كأس الأمم الأفريقية لعام 1996 فى حنوب أفريقيا

هداف منتخب مصر للشباب (زيمبابوى) 1995

اختير ضمن منتخب أفريقيا الذى تم اختيارة من الفرق الافريقية المشاركة فى كأس الأمم 2002

هداف مصر فى التصفيات الأفريقية المؤهلة لكأس الأمم 1998

أفضل لاعب فى مباراة السوبر المصرى 2000-2001

انجازاته مع نادى الزمالك

بطولات للدورى العام المصرى 2000-2001 & 2002-2003& 2003-2004

بطولتان للأندية أبطال الدورى الأفريقة 1996-2002

كأس السوبر الافريقيه2002

كأس مصر 2001-2002

بطولتان كاس السوبر المصرى 2001-2002 & 2002-2003

كأس العرب للأندية مع 2003

كأس السوبر السعودى المصرى 2003

أنجازاته مع المنتخب
لعب 87 مباراة دوليه أحرز خلالها 15 هدف
و لعب حازم امام لمنتخب مصر فى 5 بطولات افريقية أعوام(1996-1998-2000-2002-2004)لعب من خلالهم 17 مباراة و أحرزبها هدفين
أحراز بطولة كأس الأمم الأفريقيه بوركينا فاسو 1998

ونيجي بعد ده كله تكون هي دي النهايه والنهايه دي لاتليق بكابتن نادي الزمالك ولا بجماهير نادي الزمالك الأصيله اللي أنا بفخر أني واحد منهم

جماهير نادي الزمالك بتعتزر للفنان الخلوق كابتن حازم

dr.sambo

سلملى علي الصحف القوميه

الجرايد القوميه تحرق دم أي واحد يقراها لأن موضيعها محفوظه تلاقي فى الصفحه الأولى فخامه الرئيس عمل وسوا كأنوا شايل البلد علي دماغه -ربنا يعينه - علي كام خبر عن انجازات الوزراء فى البلد؛ وجوه الجورنان افتتاح كام مشروع وتوفير كام فرصه عمل للشباب و كام خبرعن الحزب الوطنى وأنجازات ولى العهد؛ ومقالتين تلاته تسب وتلعن في الأخوان والمعارضه و تطلعهم ولاد كلب حراميه؛ وباقيت الجرنان أخبار الفن من أخبارعن الممثلين والأفلام وحبه حاجات تافهه؛ وصفحه رياضه كل مهمتا تشعلل خناقات بين الأهلاويه والزملكويه علشان يشتغلوا الشعب ويلهوه في أي حاجه بعيد عن الحكومه وكام صفحه أعلانات علشان يملوا الجرنان وبرضه يطلعلهم قرشين حلوين وصفحه أقتصاد علشان يقولولونا أنا البلد أقتصادها زي الفل والحياه حلوه؛ وكام مقال لتبيض وش الحكومه اللى احنا على طول ظالمنها كده خلاص الجورنان خلص كل سنه وانت طيب

وفي الأخر نقوم أحنا بكل أستهتار نفرشها للأكل أو نلف فيها أي حاجه

والله احنا شعب ما بنقدر تعب الناس دى وحسبي الله ونعم الوكيل شعب جاهل

سلام. بلاش حرقه دم

dr.sambo

بلد طوابير صحيح

وقفت كام مره فى طابور؟ أكيد أول مره تسمع السؤال ده ؛ واجابه السؤال ده موجهه لأي مواطن موجود على أرض المحروسه..............بأستثناء العائله المالكه والحاشيه واللي ينول الرضا و السماح

فأنت لازم تقف فى طابور العيش كل يوم, و تقف تشتري الجرايد و الحاله دي لو مفيش فى المنطقه بتاعتك غير كشك جرايد و الجرايد بتخلص عنده قبل الضهر - منه لله صاحبي اللي كان ناوي يفتح كشك جرايد تاني ابن حلال بس رجع في كلامه- نرجع لموضوعنا تاني أو تقف فى طابور المكروباص لو أنت رايح حلوان أو الوايلي

وبتقف فى الطابور علشان تخلص مصلحه حكوميه أو تطلع بطاقه الرقم القومي أو بطاقه 6 جند علشان تأجل الجيش لو انت لسه في الدراسه طيب ما يخلصوا الموضوع ده بنهم وبين الجامعه و يريحونا ، ولا هيه المسأله طوابير و خلاص

ولو أنت من طلاب الجامعات الخاصه و ياريت تكون في جامعه مصر عليه العوض فيك هتقف في طابور بالساعات علشان تدفع كام ألف مصاريف الكليه-أي والله رايح تتدفع و بتتبهدل قله أدب

وطبعا مقدرش أنسي سوبر جت القاهره-المنصوره كل ده بخلاف الطوابير علي شببابيك التذاكر بتاعه القطوره الدرجه التانيه وخاصه الى راحه الصعيد

ده حته وأنت طفل بتقف في طابور المدرسه عاشان تتعود بعد كده علي الطوابير اليوميه الأجباريه

وحكايه المدارس دي كانت نظره مستقبليه من الحكومه بس احنا اللي مش فاهمين حاجه..و سلامات يا حكومه

Dr.Sambo

عجبي

dr.sambo